Sumeryja z antynum

Je to już pore rokuw zpatki, ale do dźiśio na to ponikierzi w Jabłunkowie wzpuminajum. Eletrykorz Sztefan przijechoł ze szychty z werku, doł se u Bullawy trzi piwa i kroczoł do chałpy. Mjyszkoł w byćie nad Fabosym. Już se zezuwoł przed dźwjyrzami, jak go sunśiod Henio popytoł, czy by mu nezaruszoł antynum. Kupił se telewizor a potrzebowoł nasztelować ČT Sport, bo se chćioł dziwać na fuzbal. A tak Sztefan jyny we fuseklach a dumowych cuklach wyluz przez uokno na dach. Akorat, że przed tym padało a dachuwki były ślizki. Miłymu Stefanowi ujechały nogi a kdyby se na łostatnium chwile niechyćił antyny, zhurczoł by naduł do Kamjynice na pysk…

Kamrat Tuncek sorkoł kawe u Kreplika. Uwidźoł przez uokno na drugi strunie rynku na dasze Fabosu chłopa. Nic dziwnego, myśloł se, asi tam cośi sprawuje. Jak wyzrził za puł godźiny, dopiero mu blyskło, źe chłop nic niesprawujwe, ale wiśi. I zawołoł policajtuw a fajermanuw. Miyndzy tym Sztefan już dwie godziny wreszczoł na dachu, ale jak na potwore, żodyn go niesłyszoł. A Henio śiedźoł przed telewizum a czakoł, aź naskoczi fuzbal…

Welitel jabłunkowskigo fajerdepa kozoł swojim synkum pobrać przilby, szlauchi i naskokać do wielki tatruwki, jak by goroł panelak w Bejrutu. Wyjechali z wielkum paradum i krawalym, bo spuśćili sirene. Dopiero na rynku, chytrok, prziszeł na to, że do wunzki Kamjynice s takim morowym autym niewjedźe i drabine newyćungnie. Borokowi Sztefanowi juź tyrczały nogi przez uokap, cukle downo spadły. Ludźi se już hafo nazbjyrało. Aż jeden mundry prziśeł na to, że je trzeba zalecieć tyn kunsek do hasiczarny po porwuz i chłopa przez uokno wycungnuć. Jak niebogigo Sztefana kuniećnie z dachu dostali, przilećiała jego baba i strzeliła mu dwa razy po pszćysku, że ji uostudy narobił, bo mioł dziurawe fusekle a wszyscy na dole to widźieli…

A Henio furt siedźioł przed telewizum a czakoł, aż Sztefan zaruszo antynum…